Diàlogu
Sardu Italianu
Simona: Custa borta m'est partu ca Giorgia no est istada segura meda... Ite naras?
Laura: A mie giai m'est pràghida comente at rispostu!
Simona: Ite naras si provamus a l'agiuare?
Laura: E comente dias bòlere fàghere? La', non mi pòngias in mesu de sas fainas tuas...
Simona: Est unu bancu ebbia a in antis de su nostru... faghe·mi leare su libru!
Laura: La' ca deo non so bona... si nos cassat sa professora...
Simona: Lassa fàghere a mie! Lu fatzo semper!
Laura: Tando... aguanta tue su libru... est mègius!
Simona: Cando sa professora li pregontat un'àtera cosa deo ti la chirco.
Laura: E deo ite b'intro?
Simona: Aberi sa bussa pitica de s'istùgiu meu...
Laura: Est prenu de cosa...
Simona: Bi depent èssere pitzuleddos de pabiru segados a piticu, los bides?
Laura: No as a bòlere passare sa risposta a Sonia pro la repìtere a Giorgia!
Simona: Nosse, àtera cumpàngia non nde podiat agatare...
Laura: Tando, comente dias bòlere fàghere?
Simona: Tue iscries sa risposta e deo la passo a suta de su bancu a Giorgia!
Laura: Dona a cura! La' ca ti cassant...
Simona: Ca nono... bi la lasso a ladu de sa cadrea! Como move·ti·nde! Pronta ses?
Professora: Ite est totu custu murighìngiu in cue a palas? Simona, mi nde depo pesare?
Simona: Nudda, fia pasende·mi...
Professora: E ite est totu cussu pabiru? Laura, ite seis iscriende?
Laura: Deo... deo fia... non b'intro nudda! Simona boliat agiuare a Giorgia...
Professora: Dae te non mi l'isetaia! E Giorgia non tenet tzertu bisòngiu de èssere agiuada dae boisàteros!
Laura: Oh, m'iscuset meda...
Professora: E tue Simona, non tenes nudda de nàrrere?
Simona: Non fiat cosa fata pro male...
Professora: Non bos pòngio sa nota petzi ca isco ca seis amigas meda...
Laura: Oh gràtzias a Deus!
Professora: Ma lunis bos apo a interrogare. Como setzide·bos e ascurtade!