Diàlogu
Sardu Italianu
Simona: Tocade ca nos nch'andamus!
Giorgia: Eja, sa gente est pesende·si·nde...
Simona: Ite ses abbaidende Laura? Intèndidu as? Semus andende·nos·nche!
Laura: Ite est?
Simona: Nara, ite fias pensende ca non nos as mancu intèndidu?
Laura: No, nudda nudda, a ue bolides andare? Nos ponimus a fàghere sos còmpitos?
Giorgia: Lassa pèrdere sos còmpitos... como nos contas totu! A lestru però!
Laura: Ma inoghe? In mesu de sa gente?
Simona: Totu sas trempas annicadas tenes... bògio ischire totu!
Giorgia: Forsis apo cumprèndidu....
Laura: Oh...
Simona: Agabba·la de t’atacare! Conta, ca sas amigas bi sunt pro s'assìstere!
Laura: Duncas, bos nd'ammentades sa die chi so ruta essende dae iscola?
Simona: Giai mi nd'ammento, sighi...
Laura: Sos pitzocheddos fiant totus riende e Mauro, brullende·si·nde, tzuntzullaiat sos àteros.
Giorgia: Petzi ca est su prus bellu... non si podet permìtere!
Simona: Belligheddu giai est belligheddu...
Giorgia: E bantadore puru... si setzet in sa cadrea bantzighende sa conca... Piticu su bragheri!
Simona: No abbàidat a peruna de sas pitzocas! Issu e sos amigos... ite fias narende Laura?
Laura: Nudda... ca... eris sero est acostadu a su bancu meu...
Simona: Ite? E ite boliat?
Laura: Boliat pedire iscusa... no est gasi barrosu comente paret...
Simona: Nara·mi sos faeddos chi t'at naradu!
Giorgia: Podet èssere puru unu pitzocheddu bonu, ma tenet pagu de si bantare cun cussos votos!
Laura: Apo isceti naradu ca m'at torradu iscusa. Est istadu gentile...
Simona: Ite bellu! Segundu mene como t'at a chircare!
Giorgia: Ma ite totu ses ghetende a pare?
Laura: La' chi non bos nde essat unu faeddu de cussu chi bos apo contadu!
Giorgia: Nosse, ca no lu naramus a nemos...
Simona: La', la', Laura, est colende inoghe acanta! De seguru pro bìdere a tie!
Giorgia: Saluda·lu! Est solu...
Laura: Oh, mi nde tirat su sùlidu! Andemus·nos·nche dae inoghe pro praghere.