Diàlogu
Sardu Italianu
Fabio: A coa depimus istudiare sa règula de Geometria...
Daniele: A ite serbit a l'ischire repìtere si tantu no l'amus cumprèndida?
Claudio: Daniele tenet resone! Ite at a bòlere nàrrere custu teorema...
Fabio: Deo giai l'apo cumprèndidu! Tocat a lu repìtere a bellu e abbaidende su disignu!
Claudio: Custu Pitàgora non nde teniat àtera cosa de si pensare?
Fabio: Abbàida su triàngulu! Comente ti parent sos lados?
Daniele: Ma Pitàgora non chistionat de unu cuadradu o de una cosa gasi?
Fabio: Eja! Ma su contu est un'àteru!
Claudio: E conta·nos·los tue, tando, ca nois no l'amus galu cumprèndidu...
Fabio: Pro sa teoria sua cussu chi contat, a primu cosa, est sa genia de su triàngulu!
Daniele: Custu m'ammentat... depet tènnere unu ladu prus curtzu e duos longos!
Fabio: E nosse! Su triàngulu non si connoschet a sa longhesa de sos lados ma a sa mesura de sos àngulos!
Daniele: Seguru ses? Mi paret ca bi fiat una règula...
Fabio: Eja, e narat ca «In onni triàngulu sa mesura de sos àngulos a parte de a intro est chentu e otanta grados». Sa longhesa de sos lados non b'intrat.
Claudio: E comente faghes a ischire cantu mesurat un'àngulu?
Daniele: A ogru giai si bidet cantu est mannu!
Fabio: Si ischis cale sunt sos àngulos no est mègius? Cun sas règulas si faghet prus a lestru puru!
Daniele: Bi nd'at una ratza chi calat dereta e mi paret chi mesuret noranta grados...
Fabio: A pustis bi nd'at un'àteru, cussu pranu, chi mesurat chentu e otanta grados...
Claudio: Tzertu si tue acostas duos àngulos deretos nde faghes unu pranu, ite ratza de iscoberta est!?
Fabio: Su triàngulu deretu est cussu de su teorema de Pitàgora! Narat ca «S'àrea de su cuadradu pesadu a pitzu de s'ipotenusa est sa summa de sas àreas de sos cuadrados pesados a pitzu de sos catetos».
Claudio: Ahh?? Non mi l'apo a regordare mai!