Diàlogu
Sardu Italianu
Professore: comente fia narende·si, sunt una pariga is programmas pro pintare cun su carculadore...
Claudio: Oh, Fabio! Ascurta, gira·ti fache a inoghe ca ti depo pregontare una cosa...
Fabio: Como? Non faghet... no l'intendes ca est isprichende su professore?
Claudio: Ti depo pregontare una cosa ebbia!
Fabio: La' ca est abbaidende a custa parte...
Claudio: Ascurta! La bides a Sara dae in cue? Dae inoghe non si bidet...
Fabio: Nosse, non si bidet mancu dae inoghe, pregonta a Daniele, ca est a sa parte sua.
Claudio: Daniele, faghe·mi su praghere...
Daniele: Ite est, in presse!
Professore: Ite seis faghende boisàteros? Ascurtende·mi seis? Ite fia narende, Fabio?
Fabio: Fiat isprichende comente faghet a pònnere sos sonos!
Professore: Ite ses faghende, Claudio, totu incurbadu a cussa parte?
Claudio: Emh... tzertu, tzertu... m'est ruta cosa...
Professore: Duncas... fia narende...
Daniele: Ite fias narende·mi?
Claudio: Faghe·mi su praghere de abbaidare a Sara dae in cue, ca deo no la bido...
Daniele: Pro ite? No l'as bida a s'intrada de iscola?
Claudio: Nosse, non m'at mancu saludadu...
Daniele: E comente diat èssere? La' ca ses isballiende·ti...
Claudio: Nosse! Ite ti paret? Inchieta ti paret?
Daniele: Mh... non mi paret...
Claudio: Totu pro neghe mia...
Daniele: Ma ite tenes? Si podet ischire?
Claudio: Eris merie l'apo chertada...
Daniele: A Sara? E pro ite? Si est bona che su pane!
Claudio: Cosa mala sa gelosia! Totu neghe de Viola e de sos abbaunzos suos...
Daniele: Ma l'ischis ca in antis, cando so andadu a gabinete, cussa ispia de Viola m'at mutidu... mancu risposta l'apo! Ite diat bòlere?
Claudio: E bae! De seguru ti depiat pregontare cosa... amiga mala che cussa...
Professore: Tando! Mi narat s'idea ca oe boisàteros seis faghende tropu trèulu... ite fia narende, Claudio?
Claudio: Emh... fiat chistionende de sos programmas...
Professore: Ma ite ses narende! La', avèrtidos seis: chi si torro a cassare chistionende si nche bogo dae sa classe! Cumprèndidu m’ais?
Claudio: Eja, cumprèndidu l'apo!