Diàlogu
Sardu Italianu
Giorgia: No, no si istorbet... ca no est nudda... como giai mi passat, apo a èssere unu pagu istraca ebbia...
Professora: Segura ses? Non ti dismajes inoghe, la'!
Giorgia: Est comente chi m'intenda dèbile dèbile...
Professora: Podet èssere chi tue sufras de pressione bassa... giai capitadu ti fiat?
Giorgia: No l'isco, mi paret de non pòdere pesare sos bratzos e sas cambas dae su bancu...
Professora: Eja, mi paret ca tue tenes sa pressione bassa! Como mutimus a sa bidella e andas a foras a isbentiare e a ti pasare! Unu pagheddeddu de abba cun tzùcaru ti diat fàghere bene...
Bidella (incarada a sa ghenna): Ite est sutzèdidu inoghe, sa professora?
Professora: Bi tenimus a Giorgia chi non s'intendet bene meda... si faghet a li fàghere una tassa de abba e tzùcaru...
Bidella: E ite tenet? Dolore de bentre?
Professora: Nosse, dolores non nde tenet, o gasi paret... ma est debilitada... est groga che su mudegru!
Bidella: Giai nde la leo deo, como...
Professora: Laura, la podes acumpangiare a Giorgia in bidelleria? A pustis torras a inoghe.
Laura: Deo? Si non depet ispricare nudda de nou...
Professora: Bae, bae! Ca giai non depo ispricare...
Bidella: Si non bolet bènnere non li faghet nudda, giai bi so deo!
Professora: No, est mègius gasi... e chi bos serbat a totus pro cumprèndere ca sa carena tenet bisòngiu de papare e de èssere curada!
Simona: Ma ite bolet nàrrere “pressione bassa”?
Professora: Sa pressione est sa fortza de su sàmbene chi curret a intro de sas artèrias portende s'ossìgenu dae su coro in ogni parte de sa carena!
Simona: Totu su coro faghet?
Professora: Eja! Est su coro chi movet su sàmbene e dat sùlidu a sa gente! Est craru?
Simona: Mi paret de àere cumprèndidu, como...
Professora: Sa fortza benit dae una alimentatzione bona, dae sa cosa de papare sana e dae su fàghere isport!