Diàlogu
Sardu Italianu
Professora: Pro ite non mi l'as naradu cando t'apo mutidu a s'interrogatzione? Giai non t'as a bòlere dismajare inoghe!
Giorgia: Non mi pariat de m'intèndere gasi male in antis... apo a tènnere basca...
Professora: Papadu as in antis de bènnere a iscola?
Giorgia: Ehm... no est chi apa papadu meda meda...
Professora: Ite as papadu? La' ca cun sa salude non tocat a brullare!
Giorgia: Unu tzichigheddu de late...
Professora: Cussu ebbia?
Giorgia: Nono, una pariga de bistocos puru...
Professora: Mi paret pagu cosa pro una pitzochedda chi depet crèschere! Tenes bisòngiu de vitaminas e de papare cosas sanas e durches a mangianu!
Giorgia: A nàrrere sa veridade deo non papo giai mai a ismurzare!
Professora: Non mi paret cosa bona pro sa salude de una pitzochedda!
Simona: Mama mia mi paret... semper narende·mi cosa...
Professora: Forsis no l'ischides ma sos giòvanos rechedent prus sustàntzias de sos mannos.
Simona: Comente podet èssere. Si sos mannos traballant e trìulant meda de prus?
Professora: Depent papare de prus ca sa carena depet crèschere!
Giorgia: Apo leadu dae domo una pariga de bistocos...
Professora: Mi paret ca at a èssere mègius chi ti los papes...
Simona: Tzertu ca si una depet mandigare cussu tantu ogni die... nde torrat tunda! E sos pitzocheddos mancu t'abbàidant!
Professora: Cun custa chistione de si pònnere a regime, sas pitzocheddas sunt làngias che unu truncu de iscova e debilitadas!
Laura: Deo papo bene...
Cumpàngiu: Giai si bidet!
Laura: Però mi càpitat de m'intèndere issimingiada...
Professora: Sa cosa importante no est cantu papas ma su chi papas! Sunt sas vitaminas e sas calorias! Est sa calidade de su màndigu!
Laura: Apo cumprèndidu...
Professora: Mègius t'intendes, Giorgia?
Giorgia: Mi paret ca m'intendo male etotu...
Professora: Toca ca mutimus a sa bidella!